You are here
Home > Crime > ಆಟಿಸಂ ಪೀಡಿತ ಪುತ್ರನ ಕೊಂದು ಕೆಎಸ್‌ಆರ್‌ಪಿ ಪೇದೆ ಆತ್ಮಹತ್ಯೆ

ಆಟಿಸಂ ಪೀಡಿತ ಪುತ್ರನ ಕೊಂದು ಕೆಎಸ್‌ಆರ್‌ಪಿ ಪೇದೆ ಆತ್ಮಹತ್ಯೆ

ಬೆಂಗಳೂರು: ಮೈಸೂರಿನ ಕೆಎಸ್‌ಆರ್‌ಪಿ ಮುಖ್ಯಪೇದೆಯೊಬ್ಬರು ಆಟಿಸಂ ಕಾಯಿಲೆಯಿಂದ ಬಳಲುತ್ತಿದ್ದ ಮಗನನ್ನು ಕೊಲೆ ಮಾಡಿ ತಾನೂ ನೇಣು ಹಾಕಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ನಡೆದಿದೆ.

ಮೈಸೂರಿನ ನೇತಾಜಿ ನಗರ ನಿವಾಸಿ ಎಂ.ವಿಶ್ವನಾಥ್‌ (41) ಎಂಬುವವರು ಕಾಟನ್‌ಪೇಟೆಯ ಗಣೇಶ್‌ ಮಹಲ್‌ ಲಾಡ್ಜ್‌ನಲ್ಲಿ ತಮ್ಮ ನಾಲ್ಕು ವರ್ಷದ ಮಗ ಸಂವಿತ್‌ನನ್ನು ಕೊಂದು, ತಾವೂ ನೇಣು ಬಿಗಿದುಕೊಂಡಿದ್ದಾರೆ.

ಸೋಮವಾರ ಮಧ್ಯಾಹ್ನ ವಿಶ್ವನಾಥ್‌ ಅವರು ಕೊಠಡಿಯಿಂದ ವಾಸನೆ ಬರುತ್ತಿತ್ತು. ಈ ಹಿನ್ನೆಲೆಯಲ್ಲಿ ಲಾಡ್ಜ್‌ನ ಸಿಬ್ಬಂದಿ ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಪೊಲೀಸರು ಬಾಗಿಲು ಮುರಿದು ಒಳ ಪ್ರವೇಶಿಸಿದಾಗ ನೇಣು ಬಿಗಿದ ಸ್ಥಿತಿಯಲ್ಲಿ ವಿಶ್ವನಾಥ ಶವ ಹಾಗೂ ಹಾಸಿಗೆ ಮೇಲೆ ಬಾಲಕನ ಶವ ಸಿಕ್ಕಿದೆ. ಎರಡೂ ಕೊಳೆತ ಸ್ಥಿತಿಯಲ್ಲಿತ್ತು. ನೇಣಿಗೆ ಮುನ್ನ ವಿಶ್ವನಾಥ್‌ ಮಗನನ್ನು ಕೊಲೆ ಮಾಡಿರಬಹುದು. ಆದರೆ, ಹೇಗೆ ಕೊಲೆ ಮಾಡಿದ್ದಾರೆ ಎನ್ನುವುದು ತಿಳಿದು ಬಂದಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.

ಸಾವಿಗೆ ಮುನ್ನ ಮರಣ ಪತ್ರ ಬರೆದಿಟ್ಟಿರುವ ವಿಶ್ವನಾಥ್‌, ಮಗನಿಗೆ ಆಟಿಸಂ ಕಾಯಿಲೆ ಇದ್ದು ಗುಣವಾಗಿರಲಿಲ್ಲ. ಇದರಿಂದ ನೊಂದು ಆತ್ಮಹತ್ಯೆ ಮಾಡಿಕೊಳ್ಳುತ್ತಿರುವುದಾಗಿ ತಿಳಿಸಿದ್ದಾರೆ.

ನಾಪತ್ತೆ ದೂರು

ಮೈಸೂರಿನ ನಿವೃತ್ತ ಪೊಲೀಸ್‌ ಸಬ್‌ ಇನ್ಸ್‌ಪೆಕ್ಟರ್‌ ಬಸ್ಸಪ್ಪ ಎಂಬುವರ ಮಗಳು ಭವ್ಯಶ್ರೀಯನ್ನು ವಿಶ್ವನಾಥ ವಿವಾಹವಾಗಿದ್ದರು. ಆಟಿಸಂನಿಂದ ಬಳಲುತ್ತಿದ್ದ ಸಂವಿತ್‌ಗೆ ಚಿಕಿತ್ಸೆ ನೀಡುತ್ತಿದ್ದರೂ ಗುಣಮುಖವಾಗಿರಲಿಲ್ಲ. ಇದರಿಂದ ದಂಪತಿ ತೀವ್ರ ಬೇಸರಗೊಂಡಿದ್ದರು.

ಮಾ.24ರಂದು ಸಂಜೆ ಮಗನನ್ನು ಪಾರ್ಕ್‌ಗೆ ಕರೆದೊಯ್ಯುವುದಾಗಿ ಹೇಳಿ ಹೊರಗೆ ಹೋಗಿದ್ದ ವಿಶ್ವನಾಥ್‌, ವಾಪಸ್‌ ಆಗಿರಲಿಲ್ಲ. ಎಲ್ಲ ಕಡೆ ಹುಡುಕಾಡಿದರೂ ಪತ್ತೆಯಾಗದ ಕಾರಣ ಮಾ.25ರಂದು ಸಂಜೆ ಮೈಸೂರಿನ ಆಲನಹಳ್ಳಿ ಠಾಣೆಯಲ್ಲಿ ಇಬ್ಬರ ನಾಪತ್ತೆ ಕುರಿತು ಬಸ್ಸಪ್ಪ ದೂರು ನೀಡಿದ್ದರು.

ಮೈಸೂರಿನಿಂದ ಬೆಂಗಳೂರಿಗೆ ಬಂದ ವಿಶ್ವನಾಥ್‌, ಕೊಠಡಿಯಲ್ಲಿ ರೂಮ್‌ ಪಡೆದು ಆತ್ಮಹತ್ಯೆ ನಿರ್ಧಾರ ಕೈಗೊಂಡಿರಬಹುದು ಎಂಬ ಅನುಮಾನವನ್ನು ಪೊಲೀಸರು ವ್ಯಕ್ತಪಡಿಸಿದ್ದಾರೆ. ಕಾಟನ್‌ಪೇಟೆ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

Please follow and like us:

Leave a Reply

Top